બોલિવૂડ ફિલ્મ ઇન્ડસ્ટ્રી ફરી એકવાર ગંભીર કાનૂની વિવાદો અને યૌન શોષણના આરોપોને કારણે કલંકિત થઈ છે. બોક્સ ઓફિસ પર ધૂમ કમાણી કરનારી રણવીર સિંહની ફિલ્મ 'ધુરંધર' ના જાણીતા પ્રોડક્શન ડિઝાઇનર સેની એસ. જોહરે વિરૂદ્ધ ચંદીગઢના સેક્ટર-17 (Sector-17) પોલીસ સ્ટેશનમાં એક પીડિત યુવતીએ યૌન ઉત્પીડનની સત્તાવાર FIR નોંધાવી છે. આ હાઈ-પ્રોફાઈલ કેસ સામે આવ્યા બાદ ફિલ્મ કલાકારો અને પ્રોડક્શન હાઉસીસમાં ભારે ફાટફૂટ અને ખળભળાટ મચી ગયો છે. અત્રે ઉલ્લેખનીય છે કે, આરોપી ડિઝાઇનર સેની એસ. જોહરે અગાઉ મનોજ બાજપેયીની સુપરહિટ વેબ સિરીઝ 'ધ ફેમિલી મેન' ના સેટ પર પણ મહત્વની જવાબદારી નિભાવી ચૂક્યો છે.

પીડિત યુવતીએ પોલીસને આપેલી પોતાની ફરિયાદમાં અત્યંત ચોંકાવનારા આક્ષેપો કર્યા છે. ફરિયાદ મુજબ, સેની એસ. જોહરેએ તે યુવતીને ચંદીગઢની એક વૈભવી ફાઇવ સ્ટાર હોટેલમાં કોઈ કામના બહાને બોલાવી હતી. હોટેલના રૂમમાં પહોંચતા જ આરોપીએ યુવતી સાથે અણછાજતું વર્તન કરીને છેડતી શરૂ કરી દીધી હતી. જ્યારે યુવતીએ આ બાબતનો સખત વિરોધ કર્યો, ત્યારે ડિઝાઇનરે તેની સાથે ક્રૂરતાપૂર્વક મારપીટ પણ કરી હતી. એટલું જ નહીં, યુવતીને તેની મરજી વિરૂદ્ધ રૂમમાં પૂરી રાખીને ગેરકાયદેસર રીતે બંધક બનાવી રાખવામાં આવી હતી.

યુવતીએ વધુમાં આરોપ લગાવ્યો છે કે હોટેલમાં તેને આપવામાં આવેલા સોફ્ટ ડ્રિંકમાં કોઈ શંકાસ્પદ નશીલો પદાર્થ (Drugs) ભેળવવામાં આવ્યો હતો, જે પીધા પછી તેની તબિયત અચાનક લથડી ગઈ હતી અને તે અર્ધબેભાન અવસ્થામાં આવી ગઈ હતી. પોલીસે પીડિતાની પ્રાથમિક પૂછપરછ અને તબીબી તપાસના આધારે 21 April 2026 ના રોજ ગુનો નોંધી લીધો હતો. જો કે, આ સમગ્ર મામલાનો ખુલાસો સોમવારે મોડી સાંજે સોશિયલ મીડિયા પર થતાં આખો કેસ ટોક-ઓફ-ધ-ટાઉન બન્યો છે. જાણવા મળતી વિગત મુજબ, FIR નોંધાયા બાદ સેક્ટર-17 પોલીસ તેની ધરપકડ કરવાની તૈયારી કરી રહી હતી, પરંતુ તે પૂર્વે જ આરોપી સેની એસ. જોહરેએ ડિસ્ટ્રિક્ટ કોર્ટમાંથી આગોતરા જામીન (Anticipatory Bail) મેળવી લીધા છે.